ធនាគារជាតិប្រកាសបញ្ចូលកូដQR ប្រាក់ដុល្លារនិងរៀលទៅក្នុងកូដតែមួយ «One Code» ដើម្បីសម្រួលការទូទាត់
ធនាគារជាតិនៃកម្ពុជា បានប្រកាសពីគម្រោងបញ្ចូលលុយដុល្លារ QR និង KHQR ទៅជាប្រព័ន្ធ «One Code» រួមមួយ ដើម្បីជួយសម្រួលដល់ការទូទាត់តាមប្រព័ន្ធឌីជីថលក្នុងប្រទេសកម្ពុជា និងប្រតិបត្តិការឆ្លងដែន លើកកម្ពស់ការប្រើប្រាស់ប្រាក់រៀល និងសម្រួលដំណើរការលក់ដូររបស់ពាណិជ្ជករ
អាជីវករភាគច្រើនកំពុងជ្រើសរើសការស្កែនកូដ QR ឬផ្ទេរប្រាក់តាមរយៈកម្មវិធីទូរសព្ទពីស្មាតហ្វូន ដោយសារមានភាពងាយស្រួល និងបត់បែន។ គិរីផូស/ប្រាក់ ចន្ធុល
ចេញផ្សាយនៅថ្ងៃ:
ពុធ, ១៨ កញ្ញា ២០២៤ ១១:១៥ - ១១:១៥(GMT+7)
អាប់ដេតនៅថ្ងៃ:
ព្រហស្បតិ៍, ១៩ កញ្ញា ២០២៤ ០២:២៨ - ០២:២៨(GMT+7)
~ ២ នាទី
ចែករំលែកទៅ:
២
ចែករំលែកទៅ:
ប្រែសម្រួលជាខេមរភាសាដោយ ចុង ស៊ីវភីង
ការប្រើប្រាស់ធនាគារឌីជីថលនឹងកាន់តែមានភាពងាយស្រួលបន្ទាប់ពីធនាគារជាតិនៃកម្ពុជា បានប្រកាសពីគម្រោងបញ្ចូលលុយដុល្លារ QR និង KHQR ទៅជា «One Code»។ ទេសាភិបាលនៃធនាគារជាតិបញ្ជាក់ថា វិធានការនេះនឹងជួយសម្រួលដល់ការទូទាត់តាមឌីជីថលនៅទូទាំងព្រះរាជាណាចក្រកម្ពុជា ក៏ដូចជាការទូទាត់ឆ្លងដែនផងដែរ។
ក្នុងសន្និសីទសារព័ត៌មានកាលពីថ្ងៃអង្គារសប្តាហ៍នេះ លោកស្រី ជា សិរី ទេសាភិបាលនៃធនាគារជាតិកម្ពុជា មានប្រសាសន៍ថា ដើម្បីសម្រួលដល់ការទូទាត់ប្រាក់តាមប្រព័ន្ធឌីជីថល ធនាគារជាតិនៃកម្ពុជានឹងច្របាច់បញ្ចូលប្រាក់ដុល្លារ QR និង KHQR ទៅជាលេខកូដតែមួយ។ នេះមានន័យថា អ្នកលក់នឹងលែងត្រូវការលេខកូដ QR ផ្សេងគ្នាសម្រាប់ប្រាក់ដុល្លារ និងប្រាក់រៀលទៀតហើយ។
ដើម្បីទាញយកប្រយោជន៍ពីប្រព័ន្ធនេះ លោកស្រី ជា សិរី បានពន្យល់ថា អ្នកទិញត្រូវមានគណនីជាដុល្លារ និងប្រាក់រៀល ដើម្បីឱ្យការទូទាត់ប្រាក់ចូលទៅគណនីផ្សេងៗរបស់អ្នកលក់ដោយស្វ័យប្រវត្តិ។
លោកស្រីបានមានប្រសាសន៍ថា៖ «ប្រសិនបើខ្ញុំចង់ចំណាយជាប្រាក់ដុល្លារ ដោយការស្កែនកូដ QR បញ្ចូលគ្នានេះ លុយរបស់ខ្ញុំនឹងត្រូវផ្ទេរទៅគណនីដុល្លាររបស់អ្នកលក់។ ប៉ុន្តែប្រសិនបើភ្ញៀវទេសចរពីប្រទេសឡាវមកទស្សនាប្រទេសកម្ពុជាដោយស្កែនកូដ QR បញ្ចូលគ្នានេះ ប្រាក់របស់ពួកគេនឹងត្រូវផ្ទេរដោយស្វ័យប្រវត្តិទៅក្នុងគណនីប្រាក់រៀលរបស់អ្នកលក់»។
លោកស្រីបានបន្ថែមថា កូដ QR បញ្ចូលគ្នានេះអាចប្រើបាន លុះត្រាតែអតិថិជនមានគណនីទាំងប្រាក់រៀល និងដុល្លារ។
«ចុះបើគេមិនចង់បានប្រាក់រៀល? ការទូទាត់តាមឌីជីថលរបស់ពួកគេមិនអាចដំណើរការបានទេ ដោយសារប្រព័ន្ធត្រូវការគណនីទាំងពីរ។ ប្រសិនបើពួកគេមានតែមួយ នោះប្រព័ន្ធមិនអាចដំណើរការបាននោះទេ»។ លោកស្រីបានបន្ថែមថា នេះជាហេតុផលចម្បងដែលធនាគារជាតិបានផ្តល់រយៈពេល ៦ខែដល់ធនាគារដើម្បីបើកគណនីប្រាក់រៀលសម្រាប់អតិថិជនរបស់ពួកគេ។
លោកស្រីបន្តថា៖ «នៅពេលយើងចាប់ផ្តើមអនុវត្ត វានឹងមានភាពរលូន។ ប្រសិនបើមិនដូចនេះទេ អ្នកលក់ខ្លះមិនអាចទទួលប្រាក់បានទេ»។
គួរបញ្ជាក់ថា កាលពីថ្ងៃទី១៩ ខែមីនា ធនាគារជាតិនៃកម្ពុជាបានជំរុញឱ្យគ្រឹះស្ថានធនាគារទាំងអស់បើកគណនីប្រាក់បញ្ញើ និងទូទាត់ប្រាក់រៀលសម្រាប់អតិថិជនទាំងអស់ដោយបន្ថែមថាវាត្រូវតែបញ្ចប់ក្នុងរយៈពេល៦ខែគិតចាប់ពីថ្ងៃអនុវត្តការណែនាំនេះ។
សេចក្តីថ្លែងការណ៍មួយបាននិយាយថា ខ្លួនមានគោលបំណងលើកកម្ពស់ការប្រើប្រាស់ប្រាក់រៀលជាវិធីទូទាត់ក្នុងប្រទេសកម្ពុជា ដើម្បីធ្វើឱ្យមានបរិយាបន្ន និងមានប្រសិទ្ធភាព។
លោកស្រី ជា សិរី បាននិយាយថា កូដ QR បញ្ចូលគ្នានេះនឹងបង្កើនការប្រើប្រាស់រូបិយបណ្ណរៀល សម្រួលការទូទាត់ក្នុងប្រទេស ក៏ដូចជាការទូទាត់ឆ្លងប្រទេស និងបញ្ចូលលេខកូដ QR ជាច្រើនចូលតែមួយ។
លោកស្រីបានបន្តថា៖ «វានឹងជួយអ្នកលក់បានកាន់តែច្រើនព្រោះធនាគារនឹងមើលខុសត្រូវគ្រប់យ៉ាង ហើយពួកគេនឹងមិនត្រូវធ្វើអ្វីផ្សេងទៀតឡើយ»។
ការព្រួយបារម្ភពាក់ព័ន្ធនឹងគណនីអសកម្ម
ទាក់ទងនឹងការព្រួយបារម្ភអំពីគណនីប្រាក់រៀលដែលអសកម្មនោះ លោកស្រី ជា សិរី បញ្ជាក់ថា នឹងមិនមានការផាកពិន័យឡើយ។
«មុននឹងអនុវត្ត [គម្រោង] យើងបានពិភាក្សាជាមួយធនាគារ និងស្ថាប័នហិរញ្ញវត្ថុទាំងអស់។ ទាក់ទងនឹងការផាកពិន័យថ្លៃសេវានេះ ធនាគារភាគច្រើនមិនមានទេ ប៉ុន្តែមានមួយចំនួនទៀតលួចធ្វើដោយមិនឱ្យយើងដឹង»។ នេះជាការបញ្ជាក់របស់លោកស្រី ដោយបន្ថែមថានឹងមានការប្រកាសមិនឱ្យផាកពិន័យសម្រាប់គណនីប្រាក់រៀលដែលអសកម្ម។
លោកស្រីបន្ថែមទៀតថា វាជាតម្រូវការសម្រាប់អតិថិជនក្នុងការមានគណនីប្រាក់រៀលដើម្បីឱ្យពួកគេប្រើប្រាស់កូដ QR បញ្ចូលគ្នា។
សេចក្តីថ្លែងការណ៍របស់ធនាគារជាតិនៃកម្ពុជា នៅថ្ងៃទី១៧ ខែកញ្ញា បានអំពាវនាវដល់ធនាគារ និងគ្រឹះស្ថានហិរញ្ញវត្ថុទាំងអស់ កុំគិតប្រាក់ពីអតិថិជនក្នុងការបើក ឬបិទគណនីប្រាក់រៀល ឬគិតកម្រៃប្រចាំឆ្នាំសម្រាប់គណនីប្រាក់រៀល ហើយពន្យល់ និងផ្សព្វផ្សាយពីគោលបំណងដល់សាធារណជនឱ្យបានទូលំទូលាយ៕
ចែករំលែកទៅ:
អ្នកប្រើប្រាស់បានចូលរួម TELEGRAM
ចូលរួមជាមួយ Kiripost Telegram Channel
ដើម្បីទទួលបានព័ត៌មានថ្មីៗរបស់យើង។
ព័ត៌មានធំៗរបស់យើងនឹងផ្ញើរទៅកាន់ប្រអប់សាររបស់អ្នកដោយផ្ទាល់។
